Anonimo Genovese, Chi se speja in la doctrina

Chi se speja in la doctrina
scrita de li gram doctor
e no menda so error,
degno è de disciplina.
Chi laxa la mëixina
per un poco d'amaror,
chi scampa d'ogni dolor,
par che tem vïa meschina.
E de quanto ben è pina
la bïa scritura lor,
ben n'avemo qualche odor,
ma in faito chi s'afina?
Se in lor se tem[e] spina
o un poco d'asperor,
la fin mena en gram dozor;
ma in oreja asenina
sona inderno l'eira fina,
ni ge prende alcun amor:
cossì l'omo vor honor,
ma da lo lavor declina.
Li cor son pim de sentina,
de peccae e de puor,
e àm un pertusaor
chi tropo ha sotir verrina,
per tirà donde se straxina
chi serà so seguïor
cum desmesurao calor
che tem l'enfernal foxina.
Car acatam la bestina
queli chi son lecaor;
ni mai trovam scampaor
chi descende in tal ruina,
donde ogn'omo se straxina
chi de De' serà traitor.
Ma defendane en quell' or
la gram pïetae divina.