Anonimo Genovese, Tu, homo chi vai per via
Tu, homo chi vai per via
san e zovem e fresco [ e forte ],
non andar per vïe torte
como nave senza guìa.
Ché, se lo mundo par che ria
e vita longa deporte,
aspeita de doe xorte:
o vejeza o marotia.
Donca faza vigoria
no te ingane ni conforte,
ni re' vento alcun te porte
donde inderé alcun no sia.
Lavora fin che n'ài baylia
anti ca l'ora te straporte
donde no se pò dar storte,
ni aver alcuna aya.
Tuta la scritura cria:
poi che seràm serrae le porte,
za no serà chi te reporte
a remendar chi marvaxia.
E' no te digo boxia
chi vanamenti te conorte:
se poi tornam gente morte,
quelli chi sum passai ne spia.
|